Сүрөтчү Влад Сохин Warm Water аттуу китебин чыгарды. Анда климаттын өзгөрүшү Тынч океандын табиятына кандай таасир этип жаткандыгы тууралуу сүрөттөр чогултулган.
“Көптөгөн жергиликтүү тургундар үчүн климаттын өзгөрүшү акыркы жылдары көп айтылып жүргөн жөн эле куру сөз эмес, бул-реалдуулук”, – дейт Сохин. Деңиз деңгээлинин көтөрүлүшү, аба ырайынын жана жээктин эрозиясынын өзгөрүшү, мөңгүлөрдүн ээриши, токойлордун кыйылышы, жаныбарлардын миграциясынын өзгөрүшү, аңчылык, балык уулоо эрежелеринин бузулушунун кесепетинен планетанын эң чоң аймагындагы жашоо туруктуулугу чоң коркунуч алдында турат”.
Автордун айтымында, анын эмгектери дүйнөнү климаттын өзгөрүшүнүн таасирин сезгендердин көзү менен кароого мүмкүндүк берет. Сүрөттөр глобалдык экологиялык көйгөйлөр тууралуу айтып берет.
2013 -жылдан бери Сохин АКШнын эң түндүк бөлүгүнөн тартып, Жаңы Зеландияга чейин саякаттап келген. Ал 18 өлкөнү жана аймакты басып өткөн. Влад ар бир саякатынан климаттын өзгөрүшү адамдардын жашоосуна кандай таасир этери тууралуу фото баян алып келип турган.
Анын сүрөттөрүндө деңиз деңгээлинин көтөрүлүшүнөн ээн калган айылдар, суу жууп кеткен көрүстөндөр, океан талкалап, агызгандан калган бетон үйлөр, жегенге эч нерсе жоктугунан өлүп жаткан деңиз мышыктары, үйлөрүнөн ажыраган адамдар бар.
takiedela.ru
Фото: Влад Сохин
