Таштанды полигонунун жанындагы “Алтын-Казык” конушунда “TRASH-3”, тагыраагы искусство+экология (art + ecology) аттуу экофестивалы өттү.
Уюштуруучулардын айтымында үч ай бою сүрөтчүлөр жана эко -активисттер менен “Искусство + Экология” темасында иштер жүргүзүлүп, 20дан ашык долбоорлор, инсталляциялар, спектаклдер, сүрөт көргөзмөлөрү көрсөтүлгөн. Алар текстиль, органикалык жана тиричилик калдыктары темасын ачып берди.
Эко-турдун жүрүшүндө искусство катышуучулары жана коноктор Бишкек таштанды полигонунда болушту.
Көптөр үчүн, Бишкекти башка жагынан, татаал жашоо шарттарын көрүү биринчи жолу болду. Эко-тур учурунда таштанды төгүлүүчү жайдын жанында жайгашкан Ала Арча суу сактагычын, кайык жана каноэ спорту боюнча чемпиондор машыгуучу спорттук базаны кыдырдык.
Сүрөтчүлөр, дизайнерлер, эко-активисттер, студенттер, музыканттар жана жөн эле кайдыгер эмес шаардыктар экологиялык жашоо образын колдонуп, табиятка карата этият мамиле жасап, креативдүү системага өтүүнү колдогон уникалдуу долбоорлорун сунушташты.
Мында жергиликтүү тургундардын иш –чарага активдүү катышуусун баса белгилөө маанилүү. Тилекке каршы, искусство фестивалы жаңы конуштарда биринчи жолу болуп жатат, анткени иш -чаралар көбүнчө шаардын борборунда гана өтүп келет.
Ошол эле учурда балдар үчүн чыгармачылык менен алектенип, китеп окуп билим алууга ылайыкталган бир дагы имарат жок. Ушундан улам “Алтын-Казык” конушунда “Куткарылган китептердин китепканасы”аттуу жаңы маданий жай пайда болду. Бул чакан имарат мурда дүкөн болгон эми жергиликтүү тургундар үчүн билим берүүчү жана чыгармачыл аянтча катары пайдаланууга берилди. Ошондой эле бул жерде баардык пайдалуу, кызыктуу иш-чараларды өткөрүүгө мүмкүн. Бул уюштуруучулардын жеке демилгеси менен ишке ашты.
Чындыгында Бишкектеги эң чоң таштанды полигонунун терс таасиринен биринчи болуп дал ушул балдар жабыркап келет. Аларга искусство, спорт тармагы тургай ичүүчү суу дагы жетиликтүү эмес.
Алтын-Казык өлкөдөгү эң ири таштанды полигондун жанында жайгашкан жаңы конуштардын бири. Адамдардын ден соолугун, өмүрүн ууландырган бул түтүн менен күн сайын ушул жакта жашаган балдар жана чоңдор дем алышат. Тилекке каршы, таштанды көйгөйү Бишкек эле эмес, бүтүндөй Кыргызстан үчүн актуалдуу.
Шаар бийлиги таштандыларды кайра иштетүүнүн заманбап инфраструктурасын түзүүгө милдеттүү. Полигонду рекультивациялоо долбоорунун ишке ашпай калышына күнөөлүүлөр жооп бериши керек. Таштандылар бүгүнкү күндө баалуу ресурс болуп эсептелет, биз экологиялык жана креативдүү альтернативалар аркылуу канткенде планетаны таштандыдан арылта алаарыбызды көрсөткүбүз келди.
Булак: bishci.com
