Стамбул аэропортунун жүргүнчүлөр терминалы сүрөтчү Дениз Сагдычтын адаттан тыш экспозициялары менен кооздолгон. Бул тууралуу Түркиянын “Anadolu” басылмасы жазды.
Көргөзмөнүн өзгөчөлүгү – эмгектер эски формалардын калдыктарынан, топчулардан, желим кутучалардан, баштыктардан жана башка таштандылардан жасалган.
Түркиянын эң чоң аба портунун оператору “IGART” тарабынан уюштурулган “0” көргөзмөсү эл аралык каттамдар уча турган аймакта ачылган.
Сүрөтчүнүн айтымында, көргөзмөгө коюлган бардык экспонаттар жүргүнчүлөрдөн калган майда таштандылардан турат.
«Көргөзмөгө динине, тилине, өңүнө карабай таштандыдан чогултулган адамдардын портреттери коюлган. Эми дүйнөнүн төрт бурчунан келген коноктор таштанды калтырууга кылдат жана аң-сезимдүү мамиле жасайт деп ишенем», – деди Д.Сагдыч.
Көргөзмөгө жалпысынан 20 эмгек коюлган. Аларды жаратууга төрт айга жакын убакыт кеткен. Сүрөттөр бул жерде үч ай бою турат. Көргөзмөнүн негизги максаты – таштандыларды кайра иштетүүнүн маанисин, мүмкүнчүлүктөрүн кеңири жайылтуу.
Видео интернеттен алынды.
