Абанын ашыкча булганышы, жагымсыз экологиялык кырдаал азыркы глобалдык дүйнөнүн негизги көйгөйлөрүнүн бири болуп эсептелет. Өлкөлөрдөгү адамдардын жашоо узактыгы, төрөлүү деңгээли, ден-соолугунун бекемдиги жана жалпы жыргалчылыгы ушул проблеманын чечилишинен көз каранды.
Йель жана Колумбия Америкалык университеттеринин окумуштуулары тарабынан иштелип чыккан Курчап турган чөйрөнү коргоо боюнча көрсөткүчтөрдүн акыркы маалыматтарына таянуу менен 2021-жылы дүйнөдөгү эң таза өлкөлөр аныкталган.
Экологиялык эффективдүүлүктүн индекси (The Environmental Performance Index (EPI)) курчап турган чөйрөнү коргоо жана экосистеманын туруктуулугу жаатындагы 10 категория, 24 көрсөткүч менен бааланган 180 мамлекетти камтыйт.
Мындай көрсөткүчтөрдүн жыйынтыгы менен Швейцария 2021-жылы дүйнөдөгү экологиялык жактан эң таза өлкө деп табылды. Бул орунду Швейцария бир канча жылдардан бери ээлеп келет жана анын далилдүү негиздери бар.
Швейцарияда абдан таза жана даамдуу суу, таза аба, көптөгөн тоолор, көлдөр жана жашыл аймактар бар. Жергиликтүү бийлик көп жылдардан бери экологиялык абалды жогорку деңгээлде сактоого багытталган маанилүү мыйзамдарды кабыл алып келген.
Швейцарияда жашоо өтө кымбат экендигине карабастан, жүз миңдеген иммигранттар бул өлкөгө көчүп барууну кыялданышат.
Мындан тышкары, Швейцария киши башына “жашыл” патенттердин саны боюнча дүйнөдө биринчи орунда турат. Тактап айтканда, Альп тоолору энергияны үнөмдөөчү технологияларды киргизүү, өндүрүш калдыктарын көмүү жана экинчи чийки заттарды кайра иштетүү боюнча алдыңкы орунда турат.
